العنوان قديم و مستهلك
و عيب استخدمه لأول بوست لى
لكن هذا هو ما حدث بالفعل منذ ثلاثة
فقد دعيت الى حفل زفاف إحدى الصديقات التى اشهد لها بحسن الخلق و الهيئة
و كانت سعادتى لا توصف لأنها أرملة فقدت زوجها الأول فى حادث اليم و انصرفت لتربية ابنتها التى تبلغ من العمر الان ستة سنوات
و اخبرتنى أن العريس يمت بصلة قرابة بعيدة لعائلة زوجها الراحل و كان دوما فى المناسبات يأتى لزيارة عائلتها مع والدته و يأتى لابنتها بلعب كثيرة .
ذهبت إلى" الفرح" و ارتديت اللى على الحبل كله الحتة الزفرة يعنى و شعرت بسعادة لجو الحفاوة التى قابلتنى بها آم العروس و آم العريس و الأحضان التى عكست فرحتنا بهذه الزيجة و نهاية طريق الآلام و الوحدة و شاركت ابنتها الصغيرة فى رقصة طفولية بفستانها الدانتيل الروز التى اخبرتنى ان بابا حسن اشتراه لها بمنتهى السعادة و تنادى العريس ببابا
حمدت الله كثيرا على كرمه الوافر فكم كنت احمل هم هذه الصديقة فى مواجهة الحياة بمفردها
و الحق يقال الفرح كان رائعا و به حفاوة بالغة و كرم ضيافة على اعلى مستوى دون ابتذال أو احداث نعمة و بالفعل هذه السيدة تستحق أكثر من ذلك
و عدت الى
المنزل أنا و زوجى فى حالة من السعادة و البشر لا توصف
و قضينا تلك الليلة فى منزل والدتى حيث تركنا العكروت ابننا الصغير ليقضى فترة الفرح مع تيتا "تويتى "كما يلقبها
و خلدنا إلى النوم فى نفس حالة السعادة و الراحة متمنيين الستر لكل البنات
لكن من قال لكم ان نونو سينام سعيد و لو لليلة واحدة
رن جرس الموبايل فى تمام الرابعة و النصف فجرا بإصرار
حاولت تجاهل الجرس لكن اصرار الرنين اخرجنى من تحت اللحاف
أن
ان
أن أأأأأأأأأأأأأأأأأأأأأأأأأأأأأأأأأأأه
كان اسم العروس على هاتفى يدق بهستيرية رددت بسرعة
- ايه يا بنتى ...خير؟
- الحقينى يا ماما نونو ......انهيار و صريخ اشبه بالعويل ....معلهش ما لقيتش غيرك اكلمه يلحقنى
- فيه ايه بس؟؟؟؟ طنط حسن .....بنتك بخير؟؟؟
- شفتى الguest book بتاعنا فيه ايه
- لأ بس انا كتبت لك فيه كلمة حلوة
- عارفة .....انا و حسن (العريس) قلنا نقعد و نقرا الجيست بوك اللى الاوتيل طلعه لينا مع التورتة و العشاء فى الجناح
- يعنى انتى مكلمانى عشان الجيست بوك فى عز الفجر
- ايوه .....(ما زال الانهيار مستمر)
اسمعى كاتبين لى ايه
"العريس وحش قوى ما يتبلعش و يا واخد القرد على ماله"
و كمان حد كاتب لى " عروسة سكند هاند"
و كمان حد كاتب لى " الحمد لله انك خلفتى من زمان و الحمد لله ان عريسك ما بيخلفش البلد مش ناقصة نسانيس"
- يا نهار اثوود (على طريقة اللمبى ) بجد فيه حد كتب لك كده و بعدين عرفوا منين ان العريس مش بيخلف ؟
- انا ما قلتش لاصحابى و لا ليكى احتراما لأهل جوزى اللى ساعدونى و شغلونى و كمان جوزونى منهم و انا كنت بارفض اى عريس عشان ما اجيبش جوز ام لبنتى .. و لما عرفت ان حسن مش بيخلف وافقت انا تعبت لوحدى قوى ..اللى كتبوا ده من قرايبى يا ماما نونو و انا عارفاهم واحدة واحدة!
- قرايبك؟!!!!!!!!
- ايوه هما لقحوا بالكلام ده كثير
- روحى صلى الفجر وما تبوزيش ليلتك عشان ناس الغل كل قلبها بناره.....
حاولت تهدئتها حتى تركتنى فى السادسة صباحا فى حالة أفضل من بداية الاتصال
لكن زوجى كان يستمع الى ما حدث و غضب و قال العريس شكله محترم جدا و مظهره محترم – مش حسين فهمى اى نعم بس راجل ملو هدومه
و لا زلنا مش عارفين ايه طبيعة و اتجاه و اصل توكسفين الغل المركز اللى يخللى ناس كثيرة تتبارى عشان تبوز فرحة قرايبها و كأن الكحكة فى ايد اليتيم عجبة و حرمانية كمان
و اكيد فيه وصلات نميمة كثير كانت فى الفرح بس الظاهر ما كفتهمش و حبوا يعملوا ملحق ليها فى الجيست بوك
هل لان الفرح كان شيك
ما تسيبوا البنت فى حالها دى شافت اهوال ياما
و ادى اول حكاوى البلاوى
الاشتراك في:
تعليقات الرسالة (Atom)
ليست هناك تعليقات:
إرسال تعليق